Казанская икона Божией Матери

Казанская икона Божией Матери

21 июля | 4 ноября




Тропáрь, глас 4

Засту́пница усéрдная,/ Мáти Гóспода Вы́шняго,/ за всех мóлиши Сы́на Твоегó, Христá Бóга нáшего,/ и всем твори́ши спасти́ся,/ в держáвный Твой покрóв прибегáющим./ Всех нас заступи́, о Госпожé Цари́це и Влады́чице,/ и́же в напáстех, и скорбéх, и в болéзнех, обременéнных грехи́ мнóгими,/ предстоя́щих и моля́щихся Тебé умилéнною душéю/ и сокрушéнным сéрдцем/ пред пречи́стым Твои́м óбразом со слезáми,/ и невозврáтно надéжду иму́щих на Тя/ избавлéния всех зол./ Всем полéзная дáруй/ и вся спаси́, Богорóдице Дéво:// Ты бо еси́ Божéственный покрóв рабóм Твои́м.

По 50-м псалме́ стихи́ра, глас 8

Прииди́те, возра́дуемся держа́вней Засту́пнице ро́да на́шего,/ Цари́це Богоро́дице, / прииди́те к ти́хому Ея́ чу́дному, / почита́емому Ангелы, / честно́му поклони́мся о́бразу. / Да́рует бо Богоро́дица ве́рным оби́льныя да́ры целе́бныя, / от неистощи́маго исто́чника святы́я ико́ны неоску́дную благода́ть источа́ющи: / тьмы избавля́ет нас искуше́ний и бед, и вся́каго греха́, / благоче́стно и Богоприя́тно прославля́ющих и чту́щих / све́тлую и чу́дную Богома́тере святу́ю ико́ну. / Тем, воспева́юще, воззове́м Первообра́зней: / ра́дуйся, любе́зная ми́ру по́моще // во спасе́ние душ на́ших.

Кондáк, глас 8

Притецéм, лю́дие, к ти́хому сему́ и дóброму пристáнищу,/ скóрой Помóщнице, готóвому и тéплому спасéнию, покрóву Дéвы,/ ускори́м на моли́тву, и потщи́мся на покая́ние,/ источáет бо нам неоску́дныя ми́лости Пречи́стая Богорóдица,/ предваря́ет на пóмощь, и избавля́ет от вели́ких бед и зол,// благонрáвныя и богобоя́щияся рабы́ Своя́.

Величание

Величáем Тя,/ Пресвятáя Дéво,/ Богоизбрáнная Отрокови́це,/ и чтим óбраз Твой святы́й,/ и́мже тóчиши исцелéния// всем с вéрою притекáющим.

Молитва

О Пресвята́я Госпоже́ Влады́чице Богоро́дице! Со стра́хом, ве́рою и любо́вию пред честно́ю (и чудотво́рною) ико́ною Твое́ю припа́дающе, мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь же Свою́ Святу́ю непоколеби́му да соблюде́т и от неве́рия, ересе́й и раско́ла да изба́вит. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ всеси́льная христиа́н Помо́щница и Засту́пница. Изба́ви же и всех, с ве́рою Тебе́ моля́щихся, от паде́ний грехо́вных, от наве́та злых челове́к, от вся́ких искуше́ний, скорбе́й, боле́зней, бед и от внеза́пныя сме́рти. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси, благода́рне воспева́юще вели́чия и ми́лости Твоя́, явля́емыя над на́ми зде на земли́, сподо́бимся и Небе́снаго Ца́рствия, и та́мо со все́ми святы́ми просла́вим пречестно́е и великоле́пое и́мя Отца́, и Сы́на, и Свята́го Ду́ха во ве́ки веко́в. Ами́нь.